रत्नागिरी : महर्षी कर्वे स्त्री शिक्षण संस्थेच्या रत्नागिरीतील शिरगाव येथील बीसीए कॉलेजमध्ये शिकणाऱ्या नऊ मुलींची कॉग्निझंट आणि इन्फोसिस या नामवंत आयटी कंपन्यांमध्ये निवड झाली आहे. बीसीए कॉलेजसह पुणे येथील के. बी. जोशी इन्स्टिट्यूट ऑफ आयटी (बीसीए) यांच्या संयुक्त विद्यमाने या कंपन्यांच्या कॅम्पस इंटरव्ह्यूचे आयोजन करण्यात आले होते.
शिरगाव कॉलेजमधील ‘टीवायबीसीए’च्या विद्यार्थिनींची आयटी कंपन्यांमध्ये आतापर्यंत मोठ्या प्रमाणात निवड झाली आहे. मागील दहा वर्षांपासून बीसीए कॉलेजच्या कॅम्पस प्लेसमेंट विभागांर्तगत विप्रो, इन्फोसिस, कॉग्निझंट, टीसीएस, अॅयटॉस, पटनी आदी मल्टिनॅशनल आयटी कंपन्यांच्या इंटरव्ह्यूचे आयोजन करण्यात येते.
यंदा इन्फोसिस कंपनीमध्ये केतकी कार्किडे, पूर्वा मडगावकर, यशश्री मयेकर, दिव्या चव्हाण यांची निवड झाली. कॉग्निझंट कंपनीमध्ये प्राची घाडी, वैष्णवी राऊत, पूर्वा मडगावकर, हिंदवी खडपकर, काजल भालवलकर, यशश्री मयेकर, केतकी कार्किडे या विद्यार्थिनींची निवड झाली. अॅप्टिट्यूट, टेक्निकल अँड एचआर परीक्षांमधून या विद्यार्थिनींची निवड झाली. यासाठी लागणारी सर्व तयारी महाविद्यालयाने विद्यार्थिनींकडून करून घेतली होती.
आतापर्यंत येथून बीसीए होऊन अनेक विद्यार्थिनी आयटी क्षेत्रात विविध पदांवर कार्यरत आहेत. या वर्षी अजूनही काही नामांकित कंपन्यांचे कॅम्पस इंटरव्ह्यूचे आयोजन करण्यात येणार आहे. या यशस्वी विद्यार्थिनींना बीसीए प्र. प्राचार्या स्नेहा कोतवडेकर व ट्रेनिंग अँड प्लेसमेंट सेलचे को-ऑर्डिनेटर प्रा. अरबाजखान फडनाईक यांच्यासह सर्व प्राध्यापकांचे मार्गदर्शन लाभले. या यशाबद्दल बीसीए स्थानीय व्यवस्थापन समितीचे अध्यक्ष प्रकाश सोहोनी, पदाधिकारी, प्राध्यापक आणि कर्मचाऱ्यांनी त्यांचे अभिनंदन केले आणि पुढील वाटचालीसाठी शुभेच्छा दिल्या.